top of page

Digital Partnership sa Estonia, Inihahanda ng DICT

January 24, 2023

Pinag-aaralan ng Department of Information and Communications Technology (DICT) ang mga lugar ng pakikipagtulungan sa Estonia, partikular sa cybersecurity at digital ID system.


Ito ay tinalakay sa isang pagpupulong sa pagitan ng DICT, na pinangunahan nina Secretary Ivan John E. Uy at Undersecretary Anna Mae Y. Lamentillo, at isang delegasyon mula sa Embahada ng Estonia na pinamunuan ni Ambassador Väino Reinart, non-resident Ambassador ng Republika ng Estonia sa Pilipinas.


“Ang Estonia ay isa sa mga nangungunang bansa pagdating sa digitalization. Sila ang pangatlo sa pinaka-cyber secure na bansa. Ang mga Estonian citizen ay binibigyan ng digital ID simula sa kanilang kapanganakan. Nais nating matuto mula sa kanilang mga pinakamahusay na kasanayan upang mailapat natin ang mga ito sa kung paano natin ginagawa ang ating national ID system,” ani Uy.


Ipinaliwanag niya na isa sa mga prayoridad ng administrasyon ni Pangulong Ferdinand Marcos Jr. ay ang mabilis na pag-iisyu ng mga National ID dahil ito ay nakikita ng gobyerno bilang isang paraan upang maging maayos at mas mahusay ang mga transaksyon sa iba't ibang ahensya ng gobyerno.


Noong nakaraang Disyembre, nagpulong sina Pangulong Marcos at Punong Ministro ng Estonia na si Kaja Kallas sa sideline ng Association of Southeast Asian Nations-European Union (ASEAN-EU) Commemorative Summit sa Brussels, Belgium. Nagkasundo sila na palakasin ang digital cooperation at e-governance cooperation sa pagitan ng dalawang bansa.


Tinitignan din ng DICT ang pakikipagtulungan sa iba pang mga bansa para isulong ang Build Better More thrust ng Administrasyong Marcos, na naglalayong tugunan ang digital divide at pagbutihin ang pagbibigay ng mga pampublikong serbisyo sa pamamagitan ng e-governance.

Next Item
Previous Item
bottom of page